Sunday 7 February 2016

ನೂರು ನೆನಪಿನ ಹೆಜ್ಜೆ


ನೂರು ನೆನಪಿನ ಹೆಜ್ಜೆ


ನಡೆಯುತಲಿ ಜತೆಯಾಗಿ
ತೋಳನು ತಬ್ಬಿ ಹಿಡಿದು,
ಭುಜದ ಮೇಲೆ ತಲೆಯನಿಟ್ಟು ;
'ನಿನ್ನಲೇ ನನ್ನ ಸ್ವರ್ಗ'
ಎನುತಿರಲು ನೀ
ನನಗೆ ಬೇರೆ ಜಗವುಂಟೆ ನಿನ್ನ ಬಿಟ್ಟು ?


ಹೇಳುತಿವೆ ಅದೇನನ್ನೋ,
ರಸ್ತೆಬದಿಯಲಿ ನಿಂತ
ಸಾಲು ಮರಗಳು; ಕೇಳು ಕಿವಿಗೊಟ್ಟು.
ನಾಚಿ ನಕ್ಕು, ತುಟಿಗಚ್ಚಿ,
"ನಿನ್ನಾ............." ಎಂದು
ಮತ್ತೆ ಬಿಗಿದಪ್ಪು; ಬಿಸಿಯುಸಿರ ಬಿಟ್ಟು.


ಹುಲ್ಲುಗಾವಲಿನಲಿ ಬಿದ್ದ
ಕಾಲುದಾರಿಯ ಬೈತಲೆ:
 ಹೆಜ್ಜೆ ಮುನ್ನಡೆದಿದೆ, ಗೆಜ್ಜೆ ದನಿಗೆ ಓ ಗೊಟ್ಟು !!
ತಿರುಗಿ ನೋಡಿದರೆ ಹಿಂದೆ
ಹಿಂಬಾಲಿಸಿವೆ ನಾಲ್ಕೂ ಹೆಜ್ಜೆಗಳು;
ಬರುವ ಬದುಕಿಗೊಂದು ನೂರು ನೆನಪಿಟ್ಟು.


-ಸತೀಶ ಉ ನಡಗಡ್ಡಿ