ಮುದುಕಿ ಮನೆ - ಹುಣಸೆ ಮರ

 

ಮನೆ ಎದುರಿಗಿನ

ಮನೆಯೊಂದರಲಿ 

ಮುದುಕಿ ಜೀವನ ಮುಗಿಸಿದ್ದಳು;

ದಿನಗೂಲಿ, ಮತ್ತೇನೋ

ಕೆಲಸಗಳನು ಮಾಡಿದ

ಆಕೆ ಕೊನೆಗೊಮ್ಮೆ ಅಂತ್ಯಗೊಂಡಿದ್ದಳು !

ನಾನು ಎಳೆವಯಸ್ಸಿನಲ್ಲಿ

ಇದ್ದಾಗಿನಿಂದ ನೋಡಿದ

ಮನೆ - ಮುದುಕಿ ಇಬ್ಬರೂ ಈಗ ಇಲ್ಲ.

ಅದೆಂದಿನಿಂದಲೋ ಬೆಳೆದು

ಉಳಿದಿದ್ದ ಹುಣಸೆ ಮರವನು 

ಮುದುಕಿಯ ಹಿಂದೆ ಹಿಂದೆಯೇ ಸಾಗ ಹಾಕಿದರು !!

ಮನೆಯಲ್ಲಿದ್ದ ಮುದುಕಿಯೂ

ಹಾಗೂ ಆ ಹುಣಸೆ ಮರವೂ

ಅದೆಷ್ಟೋ 'ಕಿಡಿಗೇಡಿ'ಗಳ ಕಲ್ಲಿನೇಟು ತಿಂದಿವೆ:

ಆದರೂ, ಬದುಕಿದ್ದವು ಮನೆ

ಮತ್ತು ಮರ- ನೆರೆಹೊರೆಯವರಂತೆ;

ಈಗ ನೋಡಿದರೆ ಅಲ್ಲಿ ಎಲ್ಲವೂ ಖಾಲಿ ಖಾಲಿ ...

ನೇಸರನುದಯಕ್ಕೆ ಅಡ್ಡಿಯಾದ

ಮರವಿಂದು ಇಲ್ಲವಾಗಿ ಮನೆಯ

ಒಳ ನುಗ್ಗಿದೆ ಎಳೆ ಬಿಸಿಲ ಕಿರಣ ಹೊಸ್ತಿಲು ದಾಟಿ !

ಕಣ್ಣಳತೆಯ ದೂರಕ್ಕೆ ದೃಷ್ಟಿ

ಹಾಯಿಸಿದರೆ ಸಾಕು ಅದೋ 

ಕಾಣುತ್ತೇವೆ - ಬಸವಣ್ಣನ ಗುಡಿ, ಅರಗುಡಿ!

ಕಂಬಗಳು ಅರು ನಿಂತಿವೆ,

ಅವು ಹಾಗೆ ನಿಂತಲ್ಲೇ ನಿಂತು 

ಒಂದಷ್ಟು ವರ್ಷಗಳು ಕಳೆದಿವೆ, ಕಳೆಯಬೇಕು!

ಮನೆಯನ್ನು ಕೆಡವಿ

ಮತ್ತೊಂದನ್ನು ಕಟ್ಟುವ

ತವಕದಲ್ಲಿದ್ದಾರೆ ನಾಲ್ಕಾರು ಜನರು - ಮತ್ತೊಬ್ಬರಿಗೆ !!