ಎಷ್ಟು ಅರಾಮಗಿದ್ದ ವರ್ಷ ಹೋಗೆ ಬಿಟ್ಟಿತು:
ಜನವರಿಯಲ್ಲಿ ತೊಟ್ಟ ಗಟ್ಟಿ ಪಣ
ಜನವರಿ ಬಂದರೂ ಗಟ್ಟಿಯಾಗಿ ಹಾಗೇ ಉಳಿದಿದೆ.
"ಬಡ್ಡಿ ಮಗಂದು, ಸಿಕ್ಕಾಪಟ್ಟೆ ಗಡಸು!"
ಮತ್ತೊಂದು ಪಂಥ ಏನು ಮಾಡೋದು ,
ಹಿಂದಿನ ಪಣವೇ ಉಳಿದಿರುವಾಗ ಹೆಣದಂತೆ?
ಎಚ್ಚೆತ್ತುಕೊಳ್ಳದ ಪ್ರಾಣಿಗೆ ಗಾಢ ನಿದಿರೆಯಲೂ
ಹುಚ್ಚೆದ್ದು ಕುಣಿದಿದೆ 'ಮಾಡಬೇಕು ಹೊಸದು' ಎಂಬ ಚಿಂತೆ.
ಬರಿಯ ಮುನ್ನೂರರವತ್ತೈದು ದಿನ ಸಾಲದು
ಅಂದುಕೊಂಡದ್ದನ್ನೆಲ್ಲ ಸಾಧಿಸಿ ಎಸೆಯಲು,
'ಶಾರ್ಟ್ ಟರ್ಮಿನ ಲಾಂಗ್ ಪ್ಲಾನ್' ಜೋಕ್ - ಅದು
ಮಾಡಕೂಡದೆಂಬ ಕಟ್ಟಾಜ್ಞೆ ನಿನಗೆ ಅಳಲು.
'ಬೆಂಚು ಮೇಲೆ ಹತ್ತಿ, ಗೆಜ್ಜೆ ಕಟ್ಟಿ ಕುಣಿಯ ಬಾರಾ'
ಎಂದು ಕರೆದಿವೆ ರಾತ್ರಿಯಾಗಸದಲಿ ಚುಕ್ಕಿ ಚಂದ್ರ.
"ಮತ್ತೆ ಲಾಂಗ್ ಟರ್ಮಿನ್ ಜೋಕು, ಇದೂ ನಿನ್ನಿಂದಾಗದು"
ಹೊದ್ದು ಮಲಗು ಬಾ ಬೆಚ್ಚಗೆಂದಿದೆ ಹಾಸಿಗೆ ದಿಂಬು.
"ಇಲ್ಲ, ಏನಾದರೂ ಮಾಡಲೇಬೇಕು"
ಎಂದು ಕುಳಿತು ಯೋಚಿ(ಜಿ)ಸುತ್ತಿದ್ದೆ ಕೊನೆಗೆ;
"ಊಟ ಮಾಡು ಬಾ" ಎಂದು ಕರೆದಳು ಅಮ್ಮ
"ನಾನೇನು ಮಾಡಲಿ ಈಗ ಹೇಳಿ ಬಿಡಪ್ಪ ನೀನೇ"
✍ ಸತೀಶ ಉ ನಡಗಡ್ಡಿ
